Rom 7 | MMX | STEP | Luvutnetak mi luvurinuk. Nemi miklen lavanga salai na nenia a lok do ana vaase min, atla nemi axap miklen Lenavolo. La Lenavolo im gomgo nga mun laradi at levenaleng mun neni i rooro ren.

Romans 7

Lavapaase Poovo Boro At Loklox Epot

1 Luvutnetak mi luvurinuk. Nemi miklen lavanga salai na nenia a lok do ana vaase min, atla nemi axap miklen Lenavolo. La Lenavolo im gomgo nga mun laradi at levenaleng mun neni i rooro ren. 2 I ngan bok keretna; latkin epot ik lok maxopok at loklok tatao at latlok teren, ketla do latlok teren na met, neni xopmen bok ba nak lok at loklok tatao at latlok teren. 3 Kuren la do neni ik lox eburu mi tatlok petpes at loxonaleng, latlok teren nove i rooro, diba tong mo latkin do neni latkin longlongka; ketla do latlok teren na met, neni ira sepsu basinge loklok tatao at latlok teren, la mo do neni na epot kaka tatlok petpes, neni xopmen na lok laxakapmek.

4 Luvutnetak mi luvurinuk. Nemi bok migak lok kuren. Nemi bok migara met pam eburu mi ne Karisito basinge Lenavolo, atla nemi lengkot at labantuxu at ne Karisito, la amo nga nemi mun teren. Neni ga roo xat amlong at lanmet kusu nedik ataba pisik asu levempipisik nunuan ti ne Moroa. 5 At levenaleng nedik diga rooro mu asu lavavara at labantuxu atnedik, laxandoxoma xapmek ga umsu keneng at labantuxu atnedik, la Lenavolo at ne Moroa ga lox aplivi mo lodoxoma; kuren la nedik digak lok levempanga ga epovo ri lanmet. 6 Ketla amo nga, nedik diga met ti lorooro maut, mo ga otot tutu minedik, nedik dira sepsu ba basinge Lenavolo, la ata gugu at langas maxat at Loroonan, la kopmen bok ba Lenavolo migomgo.

Lenavolo La Laxapmek

7 Ataba tong kaka ba la? Ataba tong i do Lenavolo neni ik lox asuusu laxapmek? Kopmen tinotno. Ketla neni ba na Lenavolo ga lox aklen ia do laxakapmek ni lavanga xapmek at lemeren ne Moroa, la ga lox ase box ia mi laxapmek tarak. La nenia gi toxoklen bok loklok ti ngaongao ri lempanga at tara vetpes, do Lenavolo gi toxo vaase do, “Nemen gat u guta ngaongao ri lempanga at tara vetpes.” 8 La mumu mun Lenavolo, laxapmek ga ru kaxat la ga visik li solo mo laxakapmek keneng tarak; ketla do kopmen tenavolo, laxapmek bok noxo ruuna tololos ti lok tepanga ria. 9 Nenia bok, agak lok petpes basinge Lenavolo; ketla at loxonaleng Lenavolo ga vot, laxapmek ga roo xat keneng tarak; 10 kuren la i lok ngan ta do loroonan tarak ga met. Aga ven i xeretna do, Lenavolo ua ga vot kusu ri raba lorooro, ga raba ia mi lanmet. 11 Laxapmek ga lox epovo i xusu na xarang aruv ia mumu mun Lenavolo; la mumu Lenavolo, laxapmek ga sev amer ia.

12 Ketla Lenavolo neni i xaala, la leventaangas linga xeneng teren bok i xaala, la ik mokso la i lox avukat. 13 Kereva, lavasuun at na do luvukat at Lenavolo ga raba ia mi lanmet? Kopmen tinotno. Laxapmek axa ga raba ia mi lanmet keneng mun at Lenavolo, mo i lox avukat. Lenavolo ga vot kusu anaba ven kibis i do laxapmek ni lavanga salai; la mumu mun levempapaase at Lenavolo, laxapmek i ravasu ngan lavanga i lok kapmek tinotno.

Lodoxoma Soksokgu At Laradi

14 Nedik diklen i do Lenavolo neni boro at Loroonan Kaala; ketla nenia laradi mene nga la aga ravasu ngan lasaxaruki at laxapmek. 15 Nia xopmen anakleklen levempanga nenia ak lox i; la axok lok levempanga avukat nenia a vavara xusu anak lox i, ketla arak lok manga levempanga xapmek nenia a xopara rin. 16 At loxonaleng nenia ak lok levempanga nenia a xopara xusu anak lox i, na loklok i lox asuusu i do nenia a siam do Lenavolo neni ik lox avukat. 17 Kuren la kopmen nenia rinotno mo ak lok mo levempanga xapmek; ketla laxapmek i nemen keneng tarak, neni ik lox i. 18 Aklen i do luvukat kopmen na silok keneng at lorooro at labantuxu rak. I ruturun do lodoxoma rik lok luvukat ik lok keneng tarak, ketla nenia axo epovo xusu ana lox i. 19 Kopmen anak lok loklox avukat no nenia a vavara xusu anak lox i, ketla arak lok laxapmek no nenia axopavara xusu anak lox i. 20 Do nenia ana lok levempanga no nia a xopara xusu ana lox i, i lok ngan do kopmen nenia mo ak lox i mo, ketla laxapmek no ik lok keneng tarak, neni ik lox i.

21 Kuren la a long terex i do lara loklok mo ik lok lugugu ren keretna, at loxonaleng ak lok do anak lok luvukat, ketla kopmen, ak soxolik ka manga laxapmek. 22 La to xeneng tinotno rak, a vavara rinotno ri Lenavolo at ne Moroa. 23 Ketla a reven lodoxoma vetpes i gugu xeneng at labantuxu rak la mo i vesep eburu mi lodoxoma avukat ik lok keneng tarak. La mo lodoxoma i lok li ia xeneng at loxokoxo at laxakapmek la i gugu keneng at labantuxu rak. 24 Lainbulu silok ik lok tarak, atla nege naba lok kepe ia basinge na labantuxu im lam kaka ia ri lanmet? 25 A tong loklox avukat tinotno ri ne Moroa mumu ne Iesu Karisito, Leeme Silok atdik, atla neni naba lox arooro dik.

Kuren la lorooro rak ik lok keretna; keneng at lodoxoma rinotno rak, nenia a lok ngan lasaxaruki at Lenavolo at ne Moroa; ketla keneng at labantuxu rak, i ngan nenia a gugu ngan lasaxaruki at laxapmek.